Ah, ah guagliú, ajere jette overamente bbuono: mentre ‘o Carpi jettava fora ô Franchi, ‘a Fiorentina, a ll’Ulimpico ‘e Roma, ‘o Spezzia jettaje fora ‘a scuatra ‘e chillu sbruffone ‘e monzú garsià, fermannola ‘ncopp’ô zzero a zzero d’’e supplementare e ppo vattennola quatto a ddoje ê ricore, nuje ‘mmece cunquistajemo ‘e quarte ‘e Coppa Itaglia e mmo ce ll’âmm’’a vedé cu ‘a scuatra ‘e Mancini! Certo si fosse stato ô posto d’’e pariente ‘e chella zoccola ‘e Giulietta nn’ avesse fatto a mmeno ‘e scennere ô san Paolo: avesse sparagnato ‘e denare i ‘o trapazzo d’’o viaggio e mm’ êsse sparagnato ‘a paccheriata ca ‘mmece se venetteno a ppiglià ajeressera, quanno ‘mmerz’ê ssette s’appresentajeno a sfità ‘o Napule ca, da ‘na coppa a ll’ata,passanno p’ ‘a Roma, fove determinato a sfruttà a dduvere ll’accasione d’’a Coppa Itaglia pe scurdarese e ffà scurdà ’a meza delusione d’’o pareggio casalinco ‘e dummeneca passata contr’â roma catenacciara. E cce riuscette, riuscette facile mazzianno ‘o Verona pe ttre a zzero e se fosse pututo vencere pure pe cquatto a zzero, si Marekiaro, ‘ncopp’ô doje a zzero nun êsse fravecato dinto a ‘nu palo ‘nu ricore ca Irrati (5) ce aveva giustamente assignato pe bbia ca chill’arillo ‘e Mertenso era stato darrato (sgambettato) e menato ‘nterra a ‘nu passo dâ porta verunese.
Comme succede p’’a Coppa Itaglia se trattaje d’ antraffa (gara) unica capitata cu ‘o Verona ‘e Del Neri cu ati penziere dâ parte â capa visto ca ‘ncampiunato sta jenno ‘na fetenzia e se trova a ll’ urdemu posto cu ssulo sette punte e overamente nun se putette aspettà niente currenno appriesso â Coppa Itaglia. Cu cchesto però nun voglio dicere ca ‘o Napule facette ‘o vallo ‘ncopp’â mmunnezza, pecché, pure si ‘o Verona nun facette comme a ttutt’’e scuatre tagliane ca, quanno veneno a gghiucà ô san Paolo, scennono cu ‘a ‘ntenziona ‘e fà ‘a mubbara (partita) d’’a vita jucanno cu ‘o sanco a ll’uocchie chello ca è è: campiunato o coppa. Sinamparco (comunque)‘e pariente ‘e chella zoccola ‘e Giulietta tentajeno ‘e resistere ‘nu poco, ma facetteno ô stesso palla corta pecché i ‘o Napule ggià ô quarto minuto cu El Kadduri mettette a ffrutto ‘na granna jucata ‘ncopp’â dritta d’’a porta verunese, d’’o Pipita chiarenno súbbeto ch’aria tirava e a ll’unnicesimo raddiuppaje cu ‘na uperrosa (splendida) azziona perzunale ‘e Mertenso ca se vevette meza trasera (difesa) scaliggera pe ppo ‘nfilà ‘o pallone ‘mmiez’ê ccosce d’’o purtiere avverzario cu ‘nu tiro forte e priciso; arrivato ô 75’ Cagliecònno [poco primma trasuto ô posto d’’o Pipita] nchiudette ‘a prattica recuglienno e trasfurmanno ‘nu diaperone (traversone) d’ElKadduri justo ‘nu paro ‘e minute doppo ca Marekiaro, trasuto ô 49’ ô posto ‘e Lopezzo, êva sbagliato ‘o ricore; e accussí ‘oNapule doje avette raggiona d’’e siconne linie verunese ca facetteno a mmeno ‘e ggente comme a mMarquezzo, a tToni, a Ionita, Pazzini e vViviani. E che pretenneveno? ‘E nun perdere e dde fa risultato pusitivo? Ma jesseno ârrubbà dint’ê cchiesie!
Passammo ê ppaggelle:
REINA 6. Ll’unicu sfregazzo (sbavatura) d’’o guardiano cuano fove ‘e nun riuscí a ‘ntercettà ‘n cunchiusiona a scennere ‘a fora camma ‘e Checchinno, ca ‘ncucciaje ‘o travesagno (traversa); ‘ncumpenso ô finale fermaje ‘nterra ‘na cunchiusione periculosa ‘e n’atu profuco verunese. P’’o riesto urdinaria amministrazziona.
MAGGIO 6. ‘A solita corza a ttutta curzia, ma comme a ssempe ‘o cruzzo (cross) dô funno quase maje fove ‘nteressante.
CHIRICHES 6,5. Qualità tecniche ‘a vennere, sempe attiento e prisente a ggestiunà (governare) ‘o pallone. Nisciuna preoccupazione né a ddifennere,né p’’a riggia addietrata.
KOULIBALY 6,5. Ancòra ‘na vota titulare sàmido (inamovibile) e ô ssolito , nun sbagliaje ‘nu muvimento, campaje tranquillo pure pecché ll’attacco verunese nun tenette forza ‘e pognere, ma, si se fosse canzato, sinamparco (comunque)êsse truvato chi ll’êsse levato ‘e pponte!
STRINIC 6,5. Rappresentaje ‘na ‘mpurtante alternativa a gGhoulammo cunfermannose pulito e ccuncreto a ttutta curzia dint’ ê ddoje epate (fasi).
ALLAN 6,5. ‘Na settantina ‘e minute juste pe ttené ‘ncaudo ‘e muscole ‘nvista d’’o fullè (match) cu ll’Atalanta. Zéruso (dinamico), custantamente ‘mpressione (in pressing) e mmenuso (ispirato) cu ‘a palla ‘nfra ê piere.
[Dô 66′ CHALOBAH 6. Cchiú braduso (lento) d’’o cumpagno sinamparco (comunque)se dimustraje affattivo (efficace) ricuperanno pallune e mmettennose ‘mmostra a ll’epata (fase) ‘e pruposta].
VALDIFIORI 5,5 Êsse pututo fa ‘e cchiú; facette sí quacche ghiucata pulita e ‘nteliggente, ma fove troppo braduso (lento) jucanno troppo ‘e rica e ccumpasso senza ritmo e mmartiello e ssenza maje accellerà.
LOPEZ 6. ‘A solita quantità ‘mmediana e cquacche bbuonu allineamento tattico cumplessivo durante ‘na mubbara (partita)jucata pe ssaggià ‘a parta atletica accumincianno dô primmo minuto.
[Dô 49’ HAMSIK 5,5 Miezu zifo (voto) mancante pecché pe Marekiaro cuntinua ‘o mumento no sott’ â porta. Doppo d’’e ddoje accasione sprecate annante a Szcz?sny,ajere fravecaje ‘ncopp’ô palo ‘a palla d’’o ricore, arrivato purtroppo quanno ‘o Pipita era ggià asciuto. Sinamparco (comunque)bbona ‘a ‘ntreppetazziona d’’o darro (ruolo)].
El KADDOURI 7. Capace ‘e truvarese ô mumento justo ô posto justo seguenno cu attenziona ll’azziona anàtropa (devastante) d’’o Pipita pe mmeterla subbeto a ffrutto. Granne po ô 75’ ‘a prucressione ca se cunchiudette cu ‘o diaperone (traversone) a zzuco ‘e caramella pe cCagliecònno.
HIGUAIN 6,5. Fove isso ca ggià ô 4’mettette ‘ncopp’â scesa ‘o fullé (match) cu ‘na prucressione murtifera (letale) servenno a El Kaddouri praticamente a pporta vacante.Cercaje ‘o stuco (gol) senza truvarlo e ffacette tremmà a ttutte quanno, cauciato, rummanette ‘nterra massaggiannose ll’astracalo (caviglia). Fosse asciuto cinche minute doppo fosse tuccato a isso ‘e tirà ‘o ricore e forze nun ll’êsse sciupato!Peccato!
[Dô 70′ CALLEJON 6,5. SI ‘ncampiunato sta ancòra a vvocca asciutta ‘e stuche (gol), ‘nfra E. L, e Coppa Itaglia ne truvaje n’ ato e avette dicere grazzie a El Kaddouri ca lle rijalaje ‘nu pallone facile facile ‘a mettere sulo dinto e isso ‘o ffacette.
MERTENS 7,5 Cu ‘o periodo ‘e forma ca sta attraversanno, comme se fa a tenerlo ‘mpanca?Granne dint’ô ricato (in dribbling),nun se putette fermà manco cu ‘o ssale ‘ncopp’â coda; dinto a ll’azziona d’’o dubblato (raddoppio) ausaje tutt’’e dduje ‘e piere pe surprennere tutt’’a trasera (retroguardia) scaligera ca sta ancòra jastemmanno.Ô 74’ se prucuraje pure ‘o ricore ca Marekiaro sprecaje e poco doppo lle f?sse attuccato pure n’ato ca però Irrati nun tenette ‘o cuorio ‘e siscà. Stellare!
Sarri 7. Tenette ‘a scuatra ‘ncopp’â corda facennole capí súbbeto ca s’êv’’a jucà cu ritmo e ‘nteliggenza senza istacafà(sottovalutare) ‘a mubbara (partita)i ‘a scuatra pruvvedette a mmestiere. Bbuone ‘e cagne ‘nvista d’’a dellicata sfita ‘e Bergamo add? s’à dda jí a ffà bbella fijura.
Accussí speranno, si dDi’ vo’, ve dongo appuntamento a llunnerí ca vene! Staveti. Bbe’!
R. Bracale Brak