I’ mo che v’aggi’’a dicere guagliù?! Sulo ‘nu paro ‘e cose: ‘mprimmose ca si ce ànnu cantate e ce ànnu cantate, embè ce ànnu cuovete e ppo ca chella d’ajere fove overamente ‘na mubbara (partita) disgrazziata add? ce jette tutto stuorto, accumincianno ‘a ll’arbitraggio ‘e chillu ‘ntontero ‘e Mazzoleni[2] ca ce ne facette cchiú dd’una e ppo ve dico! Pe gghionta ‘e ruotolo, allimmeno dduje o tre gghiucature ‘mpurtante, comme Allanno, Giorgigno e mMarekiaro nun ce stetteno né cu ‘a capa, né ccu ‘e ccosce, tutta ‘a trasera (difesa) nun fove all’ardezza d’’a situazziona soprattutto cu Gulammo e addirittura cu Reina ca ‘ncopp’ô terzo stuco (gol)bulugnese facette ‘na meza fessaria e gghiette a fferní ca se perdette e perdettemo ‘a cimma d’’a crassifica e aadiritture sciuliajemo ô terzo posto doppo Interre e fFiorentina; ‘nzomma ‘o fatto fove ca ajere a ll’ora ‘e ll’apritivo ‘o Napule êsse avut’’a scennere ‘ncampo ô Dall’Ara ‘e bBulogna cu unu penziero ‘ncapo: chillo ‘e jirsene a ppiglià ‘e tre ppunte pe ddà ‘na risposta a cchilli mazze scassate ‘e mancini e d’’a scuatra soja ca sàpato a ssera cu ‘o solito stuco(gol) pe scagno, favurito ‘a ‘na papera ‘e Perinno êva vattuto ‘o ggenoa surpassanno ‘o Napule ‘ncimma â crassifica; ma tutto chesto nun succedette e ce rummanette ‘ncopp’ô stommaco ll’accio d’’a bulugnese ‘e Donadoni p’’a collera nosta i ‘o piacere ‘e tanti cestarielle tirapiere ca ‘nturnejano ‘a scuatra cuana (azzurra). Però mo si ve credite ca i’ pe bbia d’’a mubbara (partita) d’ajere êsse perzo ‘e speranze ca chisto po’ essere ll’anno d’’o Napule,ve sbagliate; s’ è ssulo pigliato ‘nu zzarro, ma mo se po’ ppiglià a ttruttà n’ata vota comme a pprimma d’’a disgrazziata antraffa (incontro) d’ajere. Ne so’ ssicuro anze è mmeglio ca ‘o ssapesseno pure monzú Garcià i â bbanda soja ca dummeneca ca vene ànn’’a vení ô san Paolo add? ll’aspetteno allimmeno ‘nu paro ‘e purpette, i è mmeglio ca se rassegnano! Passammo ‘e ppaggelle d’ajere:
REINA 4 Me dispiace, ma è accussí; ajere Pepe nun fove a ll’ardezza d’’a situazziona: rispunnette sí subbeto cu granne stile ‘ncopp’â timmurria (punizione) ‘e Brienza, ma facette poco ‘ncopp’ô primmo stuco (gol) ‘e Destro [ca però steva ‘nnurzo’e cose (in fuori gioco)ca Mazzoleni nun vulette vedé] e nun facette manco chellu ppoco quanno Rossettini (lassato troppo sulo)‘o furminaje, ncopp’ô siconno stuco (gol)e cumpletaje ‘a jurnata no quanno ncopp’ô terzo stuco (gol)se facette piglià p’’o prozo ‘a ‘n tiro fesso e ddebbule ancòra ‘e Destro. Cose ‘e pazze!
HYSAJ 4,5 Atalossa (prestazione) scadente anzicchennò; è overo ca dê pparte soje s’’a facetteno Masina e rRizzo,ca nun so’ pproprio ll’urdeme arrivate, ma ll’albanese êsse avuto fà ‘e cchiú; pe ttutta ll’antraffa (incontro) nun fove crestiano ‘e cupulià (dialogare) cu Allanno, né se vedette a appressurà (spingere). (Dô 63′ MAGGIO sv.).
ALBIOL 5,5 bBona ‘na chiusura sciuliata doppo ‘na dicina ‘e minuti; tentaje ‘e tutto pe nchiudere a dDestro partuto ‘nnurzo’e cose (fuorigioco) ma nun ce riuscette. P’’o riesto fullè (match) aunesto.
KOULIBALY 4,5 Jurnata no;pur’isso nun fove a ll’ardezza d’’a situazziona:Munierro ô pprincipio ‘e fullè (match) ‘o lassaje ‘ncopp’ô posto; jette a vvacante fallenno ‘a respinta ‘ncopp’ô tiro ‘e squina (corner) d’’o 2-0, e dDestro lle passaje ê spalle mettenno dinto ‘o terzo stuco (gol). Peccato.
GHOULAM 4 – Fremmo,’nchiummato senza cuntrastarlo guardaje a rRossettini comme zumpaje furminanno a rReina cu ‘na cabbesera (colpo di testa) ‘ncopp’ô tiro ‘e squina (corner) d’’o 2-0; a ll’epata uffenziva (in fase offensiva)sprecaje malamente ‘nu cruzzo (cross) ‘nsulitaria e pp’’o riesto facette poco e nniente.
ALLAN 5 Me dètte ‘a ‘mpressione d’essere sciso ‘ncampo senza ggenio e ppenzanno a ato e ll’atalossa (prestrazione) soja fove cchiú ‘e quantità ca ‘e qualità; ricuperaje diverzi pallune, ma pur’ isso restaje a gguardà‘ncopp’ô tiro ‘e squina (corner) d’’o 2-0; pruvaje a rriscattarese cu ‘na serpentina ô pprincipio d’arrancua (ripresa),ma nun tenette furtuna, comme nun ne tenette quanno Mazzoleni nun vulette vedé comme ‘nu bbulugnese ll’arrunzaje dint’â camma rossa e bblu durante n’azziona d’attacco d’’o Pipita.. (Dô 76′ D.LOPEZ sv).
JORGINHO 5 Marcato stritto da Diawara, quase nun se vedettee nun truvaje maje ‘o spazzio justo p’avutarese e ggestiunà (gestire) ‘o pallone; ‘nzomma n’atalossa (prestazione) ‘a scurdà!
HAMSIK 4,5 ‘O capitano nun ce stette cu ‘a capa e ccu ‘e piere sbaglianno sette e cchiú ppasiglie (passaggi) ‘e fila; durante ô primmo ajone quase nun se vedette; cumparette sí e nno sulo a ll’arrancua (ripresa) cu ‘nu pallone ca po ‘o Pipita mettette dinto p’ ‘o 3-2, ma fove acqua ca nun levaje seta e sSarri nun tenette ‘o cuorio ‘e sustituirlo!
CALLEJON 5 Jurnata scadente; pur’ isso facette poco e nun se vedette manco a ll’epata difenziva(in fase difensiva), mentre annante doppo ‘nu bbuonu pallone pe Insigne doppo 150 sicunne, Mirante mettette ‘e guante ‘ncopp’â ‘nu diacunale suojo poco putente e nun fove furtunato quanno ‘na conchiusiona soja fenette ‘ncopp’ô palo doppo ‘na dubblata (doppia) deviazione d’ Oikonomou e mMirante. (Dô 65′ MERTENS 5 – 25 minute ca fanno sperà p’’o rutizzio (turnover)ca pe sSarri è nnicessario, visto ca f?sse ora ‘e fà risciatà a quaccheduno!)
HIGUAIN 6 – Signaje quanno oramaje nun cuntaje cchiú nniente [‘a fora d’’a crassifica ‘e capartigliere (capocannoniere)],dànno ‘na speranzella ca restaje speranza: sulo accussì se guadagnaje ‘a caffa (sufficienza),ma p’ ‘o riesto no pecché si ggestiunaje (gestí)a zzuco ‘e caramella ‘o pallone ‘nnaccasione d’’o tiro ‘e Caglieconno a ll’11’, po se facette spezzà ‘e passe ‘a Masina appena s’ appresentaje ô lemmeto d’’a camma ‘e ricore rossa e bblu; ancòra, se ‘nnervusette pecché nun avette ‘nu bbuonu nummero ‘e pallune ‘a jucà, ma po quanno ll’avette ‘e sprecaje facennose nnammunatisià (ipnotizzare)’a Mirante.
INSIGNE 5 Poco pur’isso: aizaje porvere senza custrutto ‘nfessennose cu azzioni perzunale can un apprudaje a nniente ‘a fora ‘e n’ajuda (assist) p’’o Pipita.
SARRI 5 Quanno se perde è ssempe pure sfarma (colpa)d’’o trainerro; ‘a scuatra, specialmente cu ‘e tre ‘e miezo, dette ‘a ‘mpressione ‘e nun ce stà cu ‘a capa e quanno succede chesto ‘e ccosce nun ggirano comme avessen’’a fà e ssuccede ‘o llutto e isso nun tenette ‘o cuorio ‘e cagnà súbbeto a cquaccuno.
‘E ll’arbitro Mazzoleni aggiu ggià ricurdato ‘e ddoje fetenzie fàttece e cca ricordo sulo ‘e ttanti vvote can un tenette cunto [‘ndanno d’’o Napule] d’’a revula d’’o vantaggio e ssiscaje a spruposito fermanno azzioni periculose d’’e cuane.
E ffermammoce cca.
Doppo 105 juorne senza scunfitte, mo s’à dda essere bbrave a mmetterese ê spalle ‘a paccariata pigliata e a gguardà annante accumincianno ggià ‘a dummeneca ca vene ô san Paolo contro â bbanda ‘e manzú garsià. Accussí sperammo. E cu cchesto ve saluto e ce dammo appuntamento, si dDi’ vo’ viernarì ca vene doppo‘a mubbara (partita) d’E.L. c amo nun saccio contro a cchi è e add?.
R. Bracale Brak