Tutto a pposto guagliú! E mmo overamente ve pozzo augurà ‘na bbona e ssanta Pasca cu ssaluta e pruvverenzia visto ca ajere, ‘mmerze ê sseje, a ll’ora d’’e ppastarelle e dd’’o bicchirino ‘o Napule vincette contr’â scuatra d’ ‘e ppazzielle Preziosi e de chella faccia ‘e cestunia ‘e Gasperini tenenno ‘o passo d’’a zoccola janca e nnera ca ê ttre s’era accattata ‘a mubbara (partita) dô Toro allunganno ‘o passo.’O Napule però riuscette a ddarle ‘a risposta ca m’aspettavo, cu ttutto ca fove custretta a ccorrere appriesso ô risultato, dàtose ca ‘o Genoa, apprufittanno ‘e ‘na meza fessaria ‘e Koulibalý e d’’o favezo piazzamento ‘e Reina era passato ‘nvantaggio e sse penzava ‘e ‘nguajarce ‘a santa Pasca ‘ntussecannoce ‘a festa.
‘Mmece se sbagliaje pecché dalle e ddalle, ‘o cucuzziello addeventa tallo e ô sisco finale ‘e chillu fesso, vennuto ‘e Gervasoni [3] e ppo doppo ve dico, ‘’a scuatra d’ ‘e ppazzielle Preziosi e de chella faccia ‘e cestunia ‘e Gasperini s’êtte ‘a ‘ncartà ddoje scicche pastiere ‘nfurnate dô Pipita e ‘nu tortano sapurito ‘mpastato a ddoje mane da gGiorgigno e gGabbiadini e ‘nfurnato da El Kadduri! ? overo ca pe fa sí ca, comm’era justo, ‘e maccarune jesseno sotto i ‘o ccaso ‘a coppa e nno ô ccuntrario comme steva succedenno, ce mettetemo bbuone sittanta minute, ma pacienza! Sapimmo ca ‘o Napule nun sulo à dda cumbattere contro a ll’avverzarie, ma pure contro a ll’arbitro i ê tanti cestarielle ca lle menano seccia. Ajere però s’êtteno tutte quante fà a cchillu servizio pecché ‘o Ciuccio,ô finale doppo quatte minute d’anattisa (recupero) ce ‘o mettette a ppitoffio a ttutte ‘mparanza assicurannoce ‘na bbona e ssanta Pasca! Alleluja, alleluja!
Passammo ê ppaggelle:
REINA 5,5 Me dispiace, ma ‘sta vota nun pozzo metterle ‘e cchiú visto ca si è overo ca ‘o tiro ‘e Rinconno fove assaje forte, risultaje centrale e francamente Pepe êsse pututo fa coccosa ‘e cchiú forze piazzannose meglio. Peccato, pure pecché po nun tenette nient’ato ‘a fà!
HYSAJ 6,5 Uno d’’e cchiú ppusitive; cu ttutto ca dê pparte soje s’’a faceva ‘nu brutto accunto a nnomme Diego Laxalta, ll’albanese se facette vedé spisso a ll’epata ‘e màdera (fase propositiva) riuscenno sempe a cruassè (crossare)e ffove dô piero suojo ca arrivaje ll’aíuda (l’assist) p’’o stuco (gol) ‘e ll’uno a uno.
ALBIOL 5,5 Me dispiace ma manch’isso s’ammereta ‘o seje; è overo ca fove attiento ‘ncupertura ‘ncuollo a pPavoletti,facennoce a spallate, ma sott’â mez’ora se facette ‘nfilà e steva succedenno ‘o llutto; c’êva abbituate a ‘na sensazziona ‘e sicurtà (sicurezza) ca ajere nun me dètte!
KOULIBALY 5 Piezzo e ppejo d’’o cumpagno ‘e sezziona(reparto):perdette ‘o rimpallo cu Rinconno ca fulminaje a pPepe, p’’a fessaggine ‘e Gervasonis’abbuscaje ‘nu cartellino jalizzo (giallo) ca s’êsse pututo sparagnà e a ll’arrancua (ripresa)n’ata distrazziona soja cu cCerci poco mancaje e nnun ce custasse cara! ‘Nzomma troppi cale ‘e cuncentrazziona.
GHOULAM 5,5 Pur’ isso nun se mmeretaje ‘o seje visto ca ‘un riuscette a ddà cuntinuità â bbona atalossa (prestazione) ‘e Palermo: durante ô primmo ajone (nel primo tempo) se vedette poco o niente; ‘nu poco meglio a ll’arrancua (ripresa)ma fove acqua can un levaje sete.
ALLAN 6,5 – ‘O brasiliano se dètte da fà dedicannose â bbanna (all’interdizione) e pruvanno a llanzarse annante cu ccegna (grinta) e dduspeita (convinzione) migliuranno ògne minuto ca passaje.
JORGINHO 6 Festiggiaje ‘a primma cunvucazziona cu ‘a nazziunala tagliana giustranno ‘na cifra ‘e pasiglie, pure si cu ppoco zuco e ppe fessaggina soja s’abbuscaje ‘nu cartellino jalizzo (giallo) ca s’êsse pututo sparagnà.
HAMSIK 6 Ma sulo ‘e media ‘nfra ‘o cinche d’’o primmo ajone (tempo) i ‘o sette ‘e ll’arrancua (ripresa); ‘nzomma ‘a chiena i ‘a vacante d’’o capitano ca ajere nun riuscette a ffà chello ca m’êsse aspettato: Perínno lle jette a ffermà ‘o tiro facennole annuzzà ‘ncanna ‘o stuco (gol) ca ll’êsse permiso d’ancappà a mMaradona; ô prazzo (alla fine) d’’o primmo ajone (tempo) sprecaje ‘nu pallone ‘mpurtante sotto porta; menu male ca però a ll’arrancua (nella ripresa) facette coccosa ‘e cchiú alternanno però bboni ccose comme ô pallone d’’o doje a uno p’’o Pipita, cu ccose ‘a curtellate!
CALLEJON 5,5 M’aspettavo ‘ecchiú da Peppe ‘a ‘nguenta ca ‘mmece mancaje ‘e cucretezza, aizanno porvera e ògne ttanto nun facennose truvà ô posto justo ô mumento justo e addirittura cierti vvote nun riuscenno a stuppà ‘a palla.
(Dô 59′ MERTENS 6 – Trasette cu ‘a ccegna (grinta) justa e cu ‘o ggenio ‘e fà; ‘nzomma chello ch’era mancato ô spagnuolo).
HIGUAIN 9 Menu male ca joca cu ‘o Napule! ‘Nu mostro! Ajere cu ‘e duje stuche (gol) fatte tuccaje quota vintotto[dint’â smorfia: ‘e zzizze (chelle ca ‘o Pipita mettette ‘mmocca ‘o crifone p’’o fà stà zitto e mmetterlo a ddurmí!)] Fove isso ca se pigliaje p’’a mana ‘a scuatra e cumannaje ‘a tuibba (riscossa); apprimma mettette ‘ncopp’ô pere ‘e Peppe ‘a ‘nguenta ‘nu pallone d’oro ca però fove sprecato, po comme lle capitaje ll’aíuda (l’assist) bbuono [chillo d’ Hysaj] autografaje ‘o stuco (gol) d’o pareggio e ppoco mancaje ca nun se ripetesse ô 41′ quanno Laxalta riuscette a metterce ‘na pezza e ppo fove sempe Laxalta ca salvaje n’atu pallone d’’o Pipita ‘ncopp’â linia; poco male, pecché po ‘o mostro nuosto decidette ‘e vulerla vincere ‘a sulo e ccu ‘na magaria se ‘nventaje ‘nu tiro ‘e dritta a ggiro ca poco mancaje e ffacesse sgarrupà ‘o San Paolo! Applavuse e vvase ‘nfronte! (Da ll’88’ El Kaddouri 6,5 Trasette e signaje; ma ch’ ato vulite?)
INSIGNE 6 Ma sulo ‘e stima pecché pe ttutta ‘a mubbara (partita)facette poco o niente; durante ô primmo ajone (tempo) sufferette p’’a marcatura ‘e G. Silva ca ‘o turmentaje,e ll’unica vota ca se truvaje ‘nnante â porta, appujaje doce doce ‘e capa ‘mbraccio a pPerinno.A ll’arrancua (ripresa) po cierti vvote me dette ‘a ‘mpressione ca nun stesse ‘e ggenio e nnun vulesse azzardà pure quanno nn’aveva ‘a pussibbilità (Dô 74′ GABBIADINI 6 Trasette troppo tarde; pochi minute, ma ll’abbastajeno pe sfresà (sfiorare) ‘nu stuco (gol) acrubbatico e ppe ffurní a El Kaddouri ‘o pallone d’’o tre a uno!)
SARRI 6 – Diciuttesima mubbara (partita) cu ‘e stesse unneci titulare pe difennere ‘o primato casalinco ‘e ll’intero campiunato (36 punte) e ‘a ghirmazzumma (l’imbattibilità) ô San Paolo contro ‘na scuatra tosta, ma no ‘mpussibbile;ma ‘a partenza fove sfurtunata assaje , pecché,’o crifone genuano passaje praticamente â primma accasione ca lle capitaje doppo dieci minute,apprufittanno ‘e ‘na meza fessaria ‘e Koulibalý e de ‘nu piazzamento favezo ‘e Pepe Reina. Poco ‘mpurtaje però pecché pe furtuna soja e d’’o Napule, ‘o Pipita veste ‘a maglia luvarda (azzurra) e ppure ca si ‘a fatica pe vvencere fove assaje e s’êtte âspettà ll’arrancua, ô prazzo (alla fine) fernette comme êv’’a ferní â faccia ‘e ll’avverzarie, ma pure ‘e ll’arbitro, ‘e chi ce vo’ male e d’’e tanti cestarielle ca ce menano seccia! Sciú, p’’a faccia lloro!
Arbitro GERVASONI 3 E mmo ve dico pecché; no grossi ffetenzie nun ce ne facette, ma se vedette ch’era stato mannato pe spezzarce ‘e passe e ttentaje ‘e farlo d’ògne mmanera siscanno ad capocchiam e ssempe contro ê cuane (azzurri)e nutizzianno (ammonendo) ê nuoste senza ca s’’o mmeretasseno, ‘mprimmose a cKoulibalý ca avette a sola sfarma (colpa) d’essere ‘nu cummò cu ‘o specchio addó jette a sbattere ‘nu crifone cadenno ‘nterra; ma ‘a cerasella ‘ncopp’â pizza doce ce ‘a mettette ô prazzo (alla fine) d’’o primmo ajone (tempo) quanno nun era manco fenuto ‘o siconno minuto d’anàttisa (recupero) i ‘o Napule steva attaccanno a ccapa sotto cercanno ‘e pariggià, isso siscaje ‘o prazzo proprio mentre Lorenzigno, avuta ‘na bbona palla, steva tiranno…, e nun cuntento d’’o trave ‘e fuoco fatto e dd’averelo fermato, subbeto doppo ‘o nutizziaje (l’ammonì) pe nnunn’ avé bluccata ‘a coscia a mmez’aria, fermannose sott’ô colpo! Ah, ma allora o sî ffesso, o sî ccaduto ‘a copp’ô siggione ‘a piccerillo sbattenno ‘a capa, o sî vvenuto ê Piecure e ssocie. Decidite vuje. Pe mme ggià saccio!
E fermammoce cca. Ve faccio ll’avucurio mio ‘e ‘na bbona e ssanta Pasca cu ssaluta e pruvverenzia, ‘mpace cu ttutte, cumprese ‘e piecure e cchille ca s’accattano e vvenneno ‘e mmubbare (partite) e si vo’ dDio ve donco appuntamento p’appena doppo ca se torna a gghiucà, speranno ca nfi’ ô prazzo (fine) d’’o campiunato ‘o Ciuccio riesce a mantènere ‘o siconno posto ca po ‘o festiggiammo comme si êssemo vinciuto ‘o scutetto nuosto:chillo ‘e ll’auneste!
Staveti bbe’!