Ajere guagliú s’êv’ ‘a vencere assulutamente p’apprufittà d’ ‘o miezu passo favezo d’ ‘a rubbentussa [fermata ‘ncopp’a ll’uno a uno dô Genoa dint’ô cesso ‘e Torino]e p’apprufittà d’ ‘o sciuliamazzo pigliato contro ô Chievo (0 a 1) dô pappavallo ‘e Lotito; s’êv’ ‘a vencere assulutamente pe metterce ‘nsulitario ô siconno posto ‘ncrassifica e pe cuntinuà a sperà si nun ‘e vencere ‘o campiunato, ma tenenno ô mmacare sotto tiro chillu siconno/terzo posto ca nun ce sputasse ‘ncoppa! E ccomme vulette ‘o Cielo â fine vincettemo mettenno ‘na bbona preta dint’ ê ffunnamente ‘e ‘sta tempurata…, ma quanta sufferenza! Pecché ajere ‘o Napule, primma ‘e tirà fore ll’amice ‘e Maria De Filippi, sciupaje troppe accasione pe nchiudere ‘o fullé e ce riuscette sulo a ll’85° quanno Lorenzigno ncarraje ‘o lanzo bbuono pe cCavani e ‘o zengariello nuosto scartaje ‘o purtiere e mettette ‘mporta ‘a sfugliatella ca risulvette ‘a pratica ducale. Ll’avesse fatto primma me fósse sparagnato ‘e magnarme ‘o fecato. Ma era scritto ch’êv’ ‘a suffrí nsi’ a ll’urdemo e sufferette nun ve dico quanto soprattutto quanno ‘o cchiú scadente d’ ‘e cuane [e ggià avite capito ‘e chi sto’ parlanno…] ’ntervenenno a cca**o ‘e cane ‘ncopp’a ‘nu pallone senza pretese ‘o mettette dint’â porta nosta ricalanno ‘o mumentaneo pareggio a cchilli scarpare ‘e Donadoni. Che ve dicette quinnece juorne fa? Ca ‘a punizziona cchiú forte data ô Napule era stato ll’annullamento d’ ‘a scualifica ‘e Cannavaro. Cumme infatte, turnato ‘ncampo facette ‘a fessaria e ce steva arruvinanno ‘a jurnata ; n’ata ‘a facette primma perdennose a ‘nu ducale ca dètte ‘o pallone sotto porta e menu male ca De Sanctis ce mettette ‘na pezza paranno ‘a cunchiusione ‘e nun me ricordo bbuono chi, ma me pare Sansone ! Nc’ è poco ‘a fà; cu chisto ‘ncampo se soffre e âmm’ ‘a sufferí! Sperammo ca torna ampressa Gamberini!
Cumunque ‘ngenerale troppa, troppa sufferenza, accummincianno dâ difesa addó, comme ô ssolito Cannavaro è stato caturistico(determinante) ‘nsenso negativo; è overo ca ô primmo aione lle capitaje ‘e ntercettà, ‘ncopp’â linia d’ ‘a porta nosta, pe scagno, ‘nu pallone maligno,ma se rifacette a ll’arranqua cumpenzanno ‘a cosa bbona fatta cu n’iggentura (con un autogol). Nun puteva essere ca culo’echiummo facesse ‘nu fullé senza smarrunà!
A centrocampo Inler fuje troppo perezzuso (pigro); se vedette ca nun se po’ ffà a mmeno ‘e Behrami o ‘e uno comme a isso ca però nun è Dzemaili, ca pe pparta soja però, pure nun cunsideranno ll’ajuda (assist)pe Marekiaro, tenette perzunalità dimustranno ‘e puté jucà dint’ a ‘na scuatra c’ à dda luttà p’ ‘o scutetto.Se salvajeno po Marekiaro jucatore ‘e nivella (livello) ‘nternazziunala, e cCavani, ca però ‘o fullé ll’êss’ avut’ ‘a nchiudere assaje primma;ce facette risolvere ‘a pratica e va bbuono facimmolo santo subbeto, ma ajere sbagliaje quacche rredda ‘e troppo! A mMazzarri ce ‘e ddico doppo ddoje parole comme se mmereta!
Passammo ê ppaggelle va’:
DE SANCTIS 7 Se vedette subbeto ca nun s’era jucato nè ll’uno, nè ll’icchèse, ma – forze ‘o doje; cumminfatte chiammato a farse perdunà ‘a fessaria fatta a fFirenze, avette súbbeto ‘accasiona bbona doppo’na ventina ‘e minute d’ ‘o primmo aione: Sansone ‘a duje passe tiraje a bbotta sicura, e isso rispunnette ‘a campione fermanno ‘o pallone ‘ncopp’â linia. Nun ce puttette ‘mmece fà niente quanno Cannavaro lle ricalaje ll’iggentura ‘e ll’uno a uno! CAMPAGNARO 6, 5 Dê pparte soje nun se passaje ca una vota quanno Sansone riuscette a ‘ncuniarse tra isso e Cannavaro sparacchianno ‘nu pallone senza pretese ca però ‘o capitano cuano depositaje dint’â rredda ‘e De Sanctis.
CANNAVARO 3,5 M’ ‘o ssentevo ‘e scennere pe dderet’ê rine ca turnanno ‘ncampo chisto avesse smarrunato malamente… E, purtroppo accussí fuje!P’ ‘o primmo aione mettette ‘a musarola a Belfodil e lle capitaje pure, pe scagno,’e salvà ‘a porta nosta ‘a ‘nu pallone ‘nfamo…, ma a ll’arranqua facette ‘o ‘nquacchio devianno ‘mporta nosta‘nu pallone senza pretese e se perdette spisso ll’avante ducale ca pe furtuna fujeno stuppate ‘a Campagnaro e ‘a bBritos.
BRITOS 6,5 Pure si spisso se ll’êtt’ ‘a vedé cu n’accunto difficile comme a Biabiany, riuscette sempe a risolvere ‘a quistiona cu mmestiere e ‘sperienzia.
MESTO 5- Fúbbero (timido), aizaje troppa porvera ‘ncopp’â curzia addó ll’urdemi ddoje vote Maggio êva fatto addecrià.Sustituito troppo tarde!
(dô 77° ARMERO sv)
INLER 5 Senza Behrami êtte ‘a faticà sicuramente cchiú assaje, ma nun era jurnata: troppo perezzuso (pigro) nun se facette nutà comme trancara (diga), e ppoco comme direttore d’urchestra.
(dô 63° DONADEL 4,5 Po’ paré ca ce ll’aggiu cu isso…. Nun è accussí e nun m’ ‘o sto’ ‘nventanno i ca ‘o Napule perdette ‘o pallino d’ ‘o juoco proprio quanno trasette isso. Forse è sfurtuna, forse è ghiettatura… n un ‘o ssaccio ched’ è, ma cert’ è ca ‘o rapporto suĵo cu ‘o Napule nun è mmaje decullato. Forze è ‘o caso ca cagnasse aria! Ma chi s’ ‘o piglia? Justo san Gennaro ‘e Povere).
DZEMAILI 7 Forze nun po’ ffà ‘o juoco ‘e Behrami, ma nun manca ‘e perzunalità, e sapette tène ‘a posizziona cu ccegna e capacità e ajere lle capitaje po ‘e serví a Marekiaro ‘na palla fenomenale, na perla ca nun saccio quante ate avesseno ‘nfilata;ce pruvaje pure a ll’arranqua , ma fuje Cavani a sbaglià.
ZUNIGA 5,5 Sape fà e avesse pututo fà assaje ‘e cchiú ma se facette ‘mpacchettà ‘a Rosi ca ‘o tallunaje malamente. Nun me ricordo grossi fessarie, ma manco granni ghiucate!
HAMSIK 7,5 ‘A rredda ca sbluccaje ‘o fullé fuje ‘nu capolavoro ‘e pruntezza, ‘ntelliggenza e tassezza (rapidità) d’esecuzziona, ma nun fuje sulo chello. Pe tutta ‘a rencontra dispenzaje pallune ê cumpagne comme a ‘nu ‘ngignere.’O meglio ‘ncampo.
PANDEV 5,5 Bradúso (lento) e ‘mpacciato nun trasette maje veramente dint’ô juoco e m’arricordo sulo ‘na bbella palla data a Dzemaili, ca però sprecaje annante ô purtiere. Troppo poco; i’ ‘o facesse trasí sempe a ll’arranqua quanno ll’avverzario è cuncuotto.Ma Mazzarri nun ‘a penza accussí (dô 67° INSIGNE 6,5 Mazzarri dice ca Lorenzigno va meglio quanno parte dâ panca e cumminfatte ‘o chiammaje ‘ncausa â mmità ‘e ll’arranqua e ‘o guaglione dètte frischezza â manovra servenno ‘nua granna ajuda a cCavani ca facette ‘o doje a uno. ‘A chillu mumento accumminciaje a ddà spettaculo e i’ penzo ca si jucasse dô pprincipio fósse meglio pe isso e p’ ‘a scuatra!…)
CAVANI 6,5 – Nun fuje ‘o solito Cavani e se vedette dinto a ll’accasione ca avette e nun sfruttaje. Ma pure quanno nun sta ô massimo riesce sempe a ffà male comme succedette ajere quanno purtaje a cunchiusione n’ajuda ‘e Lorenzigno ‘nfilannose ‘mmiez’ê centrale ducale e futtenno a mMirante.’Mpressiunante p’ ‘a cuntinuità ca tène, si chisto segna pure quanno nun è gghiurnata significa ca pe fermarlo s’ à dda sulo sparà! E menu male ca ‘o tenimmo nuje!
All. MAZZARRI 6 Nun fuje certamente ‘o Napule cchiú spettaculare, ma sicuramente cchiú chiroforo (redditizio). ‘A scuatra jette ‘nvantaggio quase pe ccaso, êtt’ ‘a suppurtà ‘o pareggio, ma nun se scumpunette e cuntinuaje a cercà ‘a vittoria nsi’ a cche ce riuscette. E nfi’ a cche vence ave raggione isso, pure si nun sape leggere bbuono ‘e fullé, comme ajere ca ritardaje ‘o cagno ‘e Mesto e nun mettette a Insigne dô primmo minuto d’ ‘o primmo aione.
l’arbitro ROCCHI 4‘Sta meza cazetta, cummerciante (ma nun se sape ‘e che…) fiurentino ca ati vvote (me ricordo ‘e ‘nu san Zziro, cu ‘o Milan(no))aveva ggià spezzato ‘e passe napulitane, ajere cercaje ‘e mezze ‘e aumentà ‘a ddosa d’ ‘o ‘o debbeto ca tene cu nnuje nun siscanno ‘nu ricore a ffavore ‘e Cavani e cunzentenno, senza sanziunarlo a dduvere, ê ducale [ca se penzajeno ‘e stà jucanno a rugby] ‘nu juoco viulento e ammagagnato, caputianno ‘e falte e sventaglianno sotto ô naso d’ ‘e cuane cartelline jalizze e pigliannosela soprattutto cu ‘e diffidate Britos e Campagnaro ca mo se salano ‘o prossimo fullé cu ‘o Catania!
Rocchi ‘nzomma ajere facette paricchi fullune sempe ‘ndanno d’ ‘e napulitane dimustrannose arbitro senza attenziona e nun me meravigliasse ‘e saperlo ‘ncopp’ô stato paca d’Agnelli.
E fermammoce cca. Si ‘o Signore ce ‘o ffa vedé ce sentimmo dummeneca ca vène, speranno ca sàpato a ssera ‘o Napule vvence ancòra!
Bbona salute!
R.Bracale Brak